Të dielën, një 48-vjeçar është arrestuar nga Policia e Durrësit, kjo pasi hoqi me forcë flamurin e shtetit turk nga vendi i rojës detare në Gjirin e Lalzit dhe më pas e hodhi në det.
Avokati Kastriot Frashëri thotë se flamuri turk nuk duhet të ishte vendosur në kullën e vrojtimit në plazhin e Gjirit të Lalëzit dhe se pushuesi i cili e hoqi dhe e hodhi në det, nuk ka kryer vepër penale. Frashëri e konsideron qesharake procedimin penal të policisë për 48-vjeçarin dhe shtoi se veprat penale që i atribuohen atij janë të pakuptimta.
“Sigurisht, ka një rregull për përdorimin e simboleve dhe të flamurit kombëtar, i cili është i detyrueshëm për t’u zbatuar nga të gjithë institucionet dhe nga individi, por ne shohim që kjo deri më sot nuk është zbatuar. Është përdorur në një mjedis publik, në kullën e vrojtimit në plazh.
Çfarë kërkonte ai flamur atje? Ai është një vend në të cilin nuk ka nevojë të vihet flamur tjetër përveç atij kombëtar. Flamuri turk nuk duhej të ishte vendosur në kullën e vrojtimit në plazh. Fakti që ka jnë proocedim nga policia e shtetit, Më duket tejet qesharake, dy veprat penale që i atribuohen janë pa sens”, theksoi avokati.