Presidenti i Shqipërisë, Bajram Begaj, ka folur këtë të martë në lidhje me propozimin e bërë nga homologia Vjosa Osmani për nënshkrimin e një traktati mes Shqipërisë dhe Kosovës për mbrojtjen e njëra-tjetrës në rast rreziku.
Kreu i shtetit deklaroi se do të punojë intensivisht për të çuar përpara kërkesën e homologes Vjosa Osmani. Megjithatë, ai shtoi se për këtë çështje do jenë Kuvendet e dy vendeve që do të vendosin.
“Është një ide fillestare që duhet trajtuar me kujdes nga institucionet përkatëse, e mirëkuptoj Presidenten Osmani dhe do të punoj intensivisht që ky traktat bazuar në dritaren ligjore të avancojmë, por mendoj se kuvendet respektive do të jenë ato që do të vendosin. Mendoj se në kushtet aktuale të sigurisë, dhënia e këtij mendimi kërkon më shumë idenë që mbështetja e republikës së Shqipërisë duhet të jetë e nevojshme në momente të tilla. E kam thënë që Shqipëria do të jetë gjithmonë kontributore për sigurinë e Kosovës, dhe qenia e KFOR në Kosovë është një garanci e shtuar për sigurinë në rajon”, tha Begaj.
Sa i përket iniciativës “Ballkani i Hapur”, ai e quajti një projekt me përfitim për qytetarët, e për pasojë është e mirëpritur.