Banorët e 5 Majit, zonës së Laprakës, Lanës, Kombinatit, Kodrës së Priftit dhe Babrrusë dolën dje në një protestë para Bashkisë së Tiranës. Ata protestuan sa i përket shembjes së banesave të kualifikimit urban si dhe planit të rindërtimit të 2019. Kreu i Partisë së Lirisë, Ilir Meta thotë se qeveria ka vepruar si banditët, pasi ka rrëmbyer sipas tij pronat dhe banesat. Në facebook, Meta nënvizon se Partia e Lirisë ka qenë, është dhe do të jetë gjithmonë në krah të qytetarëve. “Të bashkuar do t’i largojmë pushtuesit e sektit rilindas nga zyrat e shtetit shqiptar”.
Postimi i plotë
Partia e Lirisë mbështet plotësisht kauzën e drejtë të qytetarëve për të mbrojtur shtëpitë e tyre nga projektet e mafies së inceneratorëve. Pa asnjë trasparencë dhe komunikim me qytetarët, Qeveria duke vepruar si banditët, ka rrëmbyer pronat dhe banesat e tyre.
Ne solidarizohemi plotësisht me luftën e tyre për mbrojtjen e pronës, të shtëpive dhe të familjeve të tyre. Pronat e qytetarëve po vidhen në dhunim të ligjit për t’i hapur rrugë ndërtimit të pallateve ku pastrohen parat e krimit të organizuar
Partia e Lirisë ka qenë, është dhe do të jetë gjithmonë në krah të qytetarëve. Të bashkuar do t’i largojmë pushtuesit e sektit rilindas nga zyrat e shtetit shqiptar!