Edvin Shvarc, djali i përkthyesit të madh me origjinë hebreje, Robert Shvarc, i cili iu ka shërbyer 5 presidentëve është shkarkuar nga kreu i ri i shtetit, Bajram Begaj.
Shvarc mbante postin e drejtorit të informimit publik dhe marrëdhënieve me jashtë në Presidencë. Largimi nga kjo detyrë është bërë për shkak të panjehsimit të diplomës së tij të huaj nga ministria përkatëse e Arsimit.
Sekretari i Përgjithshëm i Partisë Demokratike, Flamur Noka ka publikuar edhe shkresën e largimit nga puna të Shvarc.
“Pas 19 vitesh punë në institucionin e Presidencës, ku shërbeu me profesionalizëm e korrektesë për 5 presidentë të ndryshëm, Edvin Robert Shvarc pushohet nga puna me një motivacion qesharak të shkruar në letër, pa i thënë një fjalë. Mungesë e madhe respekti nga Presidenti i Republikës ndaj një nëpunësi civil, i cili jeton me të ardhurat e kësaj pune në një apartament modest bashkë me zonjën dhe nënën e tij. Edvin Shvarc është shtetas shqiptar me prejardhje hebreje, zyrtar serioz dhe profesionist i rrallë. Ky akt i shëmtuar njollos institucionin më të lartë të shtetit. Presidenti Begaj nxitoi të shfaqte veten pa mbushur muajin në detyrë,”- shkruan Noka.
