Agjencia amerikane për ushqimet dhe ilaçet, FDA, dha autorizimin të mërkurën për injeksione përforcuese kundër COVID-19 të prodhuara nga kompanitë Pfizer dhe Moderna, të përshtatura për variantin Omicron.
Vaksinat e reja, kanë si objektiv nënvariantet BA.4 dhe BA.5 të virusit, ndërsa qeveria amerikane përgatitet për një fushatë të gjerë vaksinimi gjatë vjeshtës që pritet të fillojë brenda disa ditësh. Vaksinat e reja përfshijnë gjithashtu variantin fillestar të virusit ndaj të cilit u krijuan të gjitha vaksinat e mëparshme.
FDA-ja dha autorizimin e vaksinimit për gjithë individët nga mosha 12 vjeç e lart që kanë marrë serinë e dozave fillestare. Agjencia rekomandon një periudhë 2 mujore nga dita e marrjes së vaksinës përforcuese, një interval më i shkurtër se periudhat e rekomanduara më parë.
Dr. Peter Marks, një zyrtar i lartë i agjencisë amerikane për ushqimet dhe ilaçet, FDA, i cili mbikëqyr vaksinat, tha se shpreson që vaksinat të ofrojnë mbrojte shumë të mirë kundër sëmundjes simptomatike.
“Nuk e dimë ende nëse do të arrijmë në të njëjtin nivel, por ky është qëllimi”, tha zoti Marks.
Qeveria ka filluar punën për një fushatë në vjeshtë, e cila mund të nisë menjëherë pas takimit të enjten të grupit të ekspertëve të jashtëm të Qendrave për Kontrollin dhe Parandalimin e Sëmundjeve (CDC) dhe drejtoresha e agjencisë Rochelle Walensky të bëjë rekomandimin përfundimtar.
Shtetet e Bashkuara kanë siguruar më shumë se 170 milionë doza të të dy vaksinave në përpjekje për të shmangur efektet më të rënda të një rritjeje të mundshme të infeksioneve pas rihapjes së shkollave dhe fillimit të motit të ftohtë që i detyron njerëzit të shpenzojnë më shumë kohë në ambjentet e brendshme.
Kjo mund të jetë vaksina e fundit kundër COVID-it e ofruar falas për të gjithë amerikanët, pasi qeveria planifikon t’i zhvendosë ato në tregun komercial vitin e ardhshëm.