Këtë të martë, në Komisionin e Posaçëm Parlamentar “Për Reformën Administrativo-Territoriale në Republikën e Shqipërisë”, po zhvillohet një seancë dëgjimore me ekspertin e projektit “Bashki të Forta”, Fatlum Nurja.
Në fjalën e saj, kryetarja e Komisionit, deputetja e Partisë Socialiste, Anila Denaj deklaroi se janë 22 bashki në vend që ende nuk janë në funksion të qytetarëve.
“22 bashki sot nuk janë në shërbim të qytetarëve. Ky komision ka detyrë reformën territoriale të shkëputur nga lidershipi. Kur të shkojmë në propozime të mos e shohim sikur reforma territoriale mban të gjithë përgjegjësinë edhe të lidershipit, por ajo reformë të mos ketë kthim prapa dhe të mos jemi viktimë e një mungese efektiviteti. Duhet t’i lëmë ekspertët të diskutojnë më gjatë nëse pjesa financiare e atyre bashkive është ose jo derivat i reformës territoriale. Nuk është numri ai që determinon shërbimet për qytetarët”.
Bashkëkryetarja e Komisionit, deputetja demokrate Dhurata Çupi deklaroi se vendi ka një model si për bashkitë rurale dhe për ato urbane, ndërkohë që duhen tipologji të ndryshme. “Në rajon kemi disa modele, për bashkinë rurale dhe urbane, ndërsa ne kemi vetëm një. A jeni ju në këtë çasje që ne duhet t’i japim tipologji të ndryshme, apo jemi në këtë qasje siç jemi sot, bashki rurale. Ne nuk duhet të kompleksohemi, duhen të dyja, paketa rregullatore. Strategjia e vitit 2017 nuk doli e suksesshme”.