Kryetari i Partisë së Lirisë, Ilir Meta ka njoftuar protestën e parë të kësaj force politike, pasi ai mori drejtimin e saj. Meta bëri të ditur se protesta e parë do të jetë në 13 shtator në orën 18:00 te inceneratori i Tiranës. Meta e quajti vendin e protestës së thirrur nga PL si “kryeveprën” e korrupsionit të Qeverisë, ndërsa ftoi qytetarët që të marrin pjesë.
“Të martën që vjen protesta e parë tek inceneratori Tiranës. Protesta e parë e Partisë së Lirisë, neë 13 shtator, ora 18:00, në inceneratorin e Tiranës, “kryeveprën” e korrupsionit të Qeverisë. Ftojmë të gjithë qytetaret. Ftojmë të gjithë ata që kanë dëshire të protestojnë”, deklaroi Meta gjatë një konference për shtyp.
Meta u pyet nëse kjo protestë e parë është e organizuar ne bashkëpunim me PD. Kreu i PL-se, tha se është i ftuar të marrë pjesë kushdo, por në radhë të parë qytetarët që vidhen.
“Ne i konsiderojmë këto protesta në radhë të parë si protesta të qytetarëve. Këtë rast kemi marrë ne iniciativën, se jemi marrë gjatë me çështjen e inceneratorëve. Të gjithë janë të mirëpritur në radhe të parë qytetarët se janë taksat e tyre që vidhen”, deklaroi ai.
Se përse u zgjodh inceneratori i Tiranës për të nisur protestat, Meta tha se në çdo aferë është i përfshirë kryeministri Edi Rama.
“Në çdo aferë është Edi Rama. Ai garanton pandëshkueshmërinë për të gjithë ata rilindasit më të vegjël. Kudo është ai. E ka dorën e gjatë shumë”, deklaroi Meta.