Vëllai i biznesmenit Xhani Topallit, i cili u ekzekutua në Faliraki të Rodosit, u shpreh për mediat greke se e dinte që diçka e keqe i kishte ndodhur që në momentin kur u zhduk të shtunën e 28 gushtit.
Ai theksoi se ka qenë në dijeni të borxhit prej 100 mijë eurosh që autori i dyshuar i krimit i kishte të vëllait.
“Të gjithë jemi në zi për humbjen e Xhanit. Fatkeqësisht, që në momentin e parë që i humbëm gjurmët , kuptuam se diçka e keqe i kishte ndodhur. Vëllai im ishte një njeri familjar. Të gjithë këtu në Falirak e njihnin dhe e donin. Dija gjithçka për borxhin që i kishte hotelieri, ra shumë në kontradita dhe e besuam që i kishte bërë diçka të keqe”, tha Kristos Topalli.
Për paratë që i detyrohej Topalit, hoteleri kishte firmosur edhe një dokument njohjeje borxhi para avokatit Minas Tserkis.
“Dy vite më parë erdhën edhe në zyrën time dhe u firmos konstatimi i borxhit. Hotelieri kishte firmosur se i kishte borxh 100 mijë euro. Katër ditë para vrasjes së Janisit e kisha takuar dhe e kisha pyetur për këtë. Në fakt, viktima më tha se hoteleri i kishte dhënë ca kusur rreth 2000 euro. Në dëshminë e tij, hoteleri ka gënjyer se e ka paguar dhe i ka dhënë 15 mijë euro shtesë. Ky ishte edhe gabimi që ai bëri, pasi u ngritën dyshimet e familjes. Ai konsideronte se kishte siguruar alibi dhe ishte kujdesur për gjithçka”, deklaroi Tserkis.