Sociologu Gëzim Tushi ka shprehur shqetësimin për komunikimin brutal mes të rinjve, larg atij spiritual dhe të vërtetë.
I ftuar në “Shije Shtëpie”, Tushi vë në dukje se si në shoqërinë e sotme po zbehet gjithnjë e më shumë gjuha e mirësjelljes dhe dashurisë.
“Do të më vinte mirë në qoftë se në fjalorin, në tipologjinë e komunikimeve erotike në shoqërinë tonë do të kishim zbutje të tilla të mëdha ku njerëzit të flisnin me politesë, me dashuri etj sepse vë re që ka një lloj gjuhe uniseksuale, banale, të vrazhdë. Është tjetër gjë çfarë themi në media sepse ne e kemi atë që flasim ndryshe nga ç’mendojmë, mendojmë ndryshe nga ç’flasim, para kamerave themi ndryshe, në jetë i bëjmë ndryshe, ky është njeriu. Kur thashë për këtë gjuhën uniseksuale të komunikimit, do ta them copë, më bënë shumë përshtypje kur dëgjoj, shikoj edhe vajza, femra që përdorin një gjuhë që është atipike, jashtë kontekstit gjinor…Do ta them, shikoni, në kohën e sotme ka një zbehje të erotizmit, të marrëdhënieve midis njerëzve në sferën e dashurisë dhe një prirje uniseksuale. Në njëfarë mënyre, kjo dikotomia gjinore mashkull-femër janë afruar, gati-gati duket se po bashkohen, vetëm organet gjenitale duket se po na ndajnë në mashkull dhe femër, pastaj pjesa tjetër e komunikimeve, vrazhdësisë, brutalitetit, fjalëve jashtë kontekstit dhe kjo sjell probleme të tjera. Unë mendoj që një komunikim i butë, spiritual, i vërtetë midis të rinjve të sotshëm është i domosdoshëm.