Këtë të premte, Këshilli i mandateve votoi unanimisht për shtyrjen me dy javë të raportit për ministren e Europës dhe Punëve të Jashtme, Olta Xhaçka. Pas kërkesës së PD-së, për heqjen e mandatit të Xhaçkës, deputetja e PS, Klotilda Bushka kërkoi dy javë kohë për të bashkërenduar kërkesat e Partisë Demokratike.
Në fjalën e tij, kryetari i Grupit Parlamentar të PD-së, Enkelejd Alibeaj ironizoi kërkesën e ardhur nga mazhoranca, duke i cilësuar si sebepe për të shtyrë mbledhjen. Në fund deputeti ra dakord për shtyrjen e mbledhjes me 14 ditë.
“Që kërkoni çdo sebep për ta shtyrë mbledhjen kjo dihet. Që janë dy kërkesa kjo është e vërtetë. Ju kërkuat edhe më herët kohë për tu njohur me procedurat. Rëndësi ka ti shkohet deri në fund, s’duhet të nxjerrim sebep. Dy javë, por dy javë të jenë, jo më shumë dhe jo të vijmë këtu pas dy javësh dhe të themi se duhet të njihemi dhe me disa materiale të tjera”.