Gjykata e Lartë ka rrëzuar rekursin e bërë nga Ilir Meta, për pushimin e çështjes lidhur me një kallëzim të tij kundër ish-kreut të Këshillit të Emërimeve në Drejtësi, Ardian Dvorani. Gjykata e Posaçme Kundër Korrupsionit dhe Krimit të Organizuar kishte pushuar çështjen, por Meta e dërgoi atë në Gjykatën e Lartë, për të ndryshuar vendimin.
Përplasja e fortë publike mes tyre që shkoi deri në dyert e Prokurorisë së Posaçme, lindi për shkak të interpretimeve të ndryshme të Kushtetutës nga Presidenti dhe KED, gjatë procesit të zgjedhjes së anëtarëve të rinj të Kushtetueses.
Meta e kishte kallëzuar Dvoranin për veprat penale të “shpërdorimit të detyrës” dhe “përvetësimit të titullit apo detyrës shtetërore”. Hetimi i nisur ndaj Dvoranit pas kallëzimit të Metës, u pushua nga Gjykata e Posaçme në nëntor të vitit të kaluar me kërkesë të SPAK, që nuk gjeti elementë të veprës penale në veprimet e Dvoranit. Vendimi u la i pandryshuar nga Apeli i Posaçëm në janar 2022.