Alessia Piperno, një vajzë nga Italia është arrestuar nga autoritetet iraniane dhe po mbahet në një burg në Teheran.
Prindërit e 30-vjeçares raportuan se kanë marrë një telefonatë nga vajza e tyre për ndihmë.
“Ju lutem më ndihmoni, kam frikë se nuk do të dal më”.
Familjarët e të resë kanë bërë një thirrje në rrjetet sociale. Alessia, shkruajnë prindërit e saj, “është një udhëtare e vetmuar, ajo udhëton nëpër botë për të mësuar mbi zakonet dhe traditat e popujve. Ajo gjithmonë ka përshtatur dhe respektuar traditat, dhe në disa raste, detyrimet e çdo vendi që ka vizituar”.
Babai dhe mamaja e saj nuk kishin dëgjuar më për të që nga 28 shtatori, ditëlindja e saj. Më pas thirrja: “Ishte ajo që duke qarë na paralajmëroi se ishte në burg. Në Teheran. Në Iran. Ajo u arrestua nga policia së bashku me miqtë e saj teksa po përgatitej të festonte ditëlindjen. Ishin vetëm pak”.
“Ende nuk dimë asgjë, as arsyen e burgosjes – lexojmë ende në postimin e familjes – dua të dihet dhe ky lajm të arrijë sa më shumë njerëz, ndoshta të shkojë tek i duhuri që mundet. Na ndihmoni”.