Gjatë një konference këtë të hënë me shefen e FMN-së, guvernatori i Bankës së Shqipërisë, Gent Sejko, tha se fokusi primar i politikave ekonomike duhet të jetë marrja e masave të koordinuara për zbutjen kostove të inflacionit.
“Inflacioni në vend shënoi 8% në muajin gusht, duke shfaqur rritje të shpejtë dhe duke pasur bazë të gjerë. Ky inflacion i lartë përbën rrezikun kryesor mbi stabilitetin makroekonomik, gërryen fuqinë blerëse të familjeve dhe dëmton perspektivën afatgjatë të zhvillimit të vendit. Për këtë arsye, fokusi primar i politikave ekonomike duhet të jetë marrja e masave të koordinuara për zbutjen kostove të inflacionit dhe për kthimin e tij në objektiv sa më shpejt”.
Pavarësisht kësaj, Sejko theksoi edhe se “ekonomia shqiptare do të rritet në periudhën afatmesëm, ndonëse aktiviteti ekonomik do të vuajë pasojat e inflacionit”.