Pas kritikave të ashpra për deklaratat e kryeministrit Edi Rama në Asamblenë e Përgjithshme të Këshillit të Europës, ka reaguar Presidenti i PPE Aleksander Pociej.
Ai ka bërë me dije se si shkak i ndërhyrjeve të Ramës në Asamble, është marrë vendimi për të anuluar një darkë pune të planifikuar.
“Me keqardhjen të thellë, pas ndërhyrjes sot pasdite në mbledhje të Kryeministrit të Shqipërisë, z. Edi Rama, Komisioni Presidencial ka marrë një vendim për të refuzuar ftesën e Kryeministrit për një darkë pune”, thuhet në reagim.
Kujtojmë se gjuha e përdorur sot në fjalim nga kryeministri Rama ka ngjallur pakënaqësi, ndërsa disa prej përfaqësuesve kanë shprehur indinjatën pa u mbyllur takimi.
Përfaqësuesi i Rumanisë u shpreh se Këshilli nuk është Prokurori, referuar pjesës ku Rama foli për raportin e Dick Martyt për trafikun e supozuar të organeve gjatë luftës në Kosovë dhe asaj që po ndodh me ish krerët e UÇK-së në Dhomat e Posaçme në Hagë.