Të tjera detaje janë zbardhur në lidhje me arrestimin e Luis Gaxhës dhe Rigers Spahiut në Elbasan, të cilët sipas policisë dyshohet se po bëheshin përgatitjet për ekzekutimin e disa personave.
Mësohet se aksioni i ditës së sotme kishte nisur prej gati dy javësh, në momentin kur u arrestua për heroinë Xhafer Deliu.
Bëhet e ditur se në telefonin e sekuestruar të Xhafer Deliut në 8 tetor të këtij viti, i janë gjetur fotografitë e biznesmenit që dyshohet se ishte në plan për tu ekzekutuar nga dyshja e arrestuar Spahiu dhe Gaxha, si dhe e një tjetër personazhi shumë të njohur në Elbasan, i cili doli në skenë pas dëshmisë së Dumanit.
Si rezultat i punës hetimore të kryer nga ana e prokurorisë së Elbasanit dhe policisë, u arrit që të shkohej deri në arrestimin e Rigers Spahisë dhe Luis Gaxhës, duke parandaluar në këtë mënyrë një atentat të mundshëm ndaj biznesmenit të njohur në Elbasan.
Po ashtu, bëhet e ditur se Deliu mund të jetë informator i dyshes Spahiu-Gaxha, ose edhe vrasës me pagesë.
Kujtojmë që në momentin e ndërhyrjes për arrestimin e dy personave të rrezikshëm Luiz Gaxha dhe Rigers Spahiu, policia e Elbasanit ka sekuestruar një arsenal të madh armësh.