Sulmet ruse ndaj infrastrukturës civile të Ukrainës janë “akte terrori”, tha presidentja e Komisionit Europian Ursula von der Leyen në një konferencë në Berlin, shkruan CNN.
“Moska ka udhëhequr qëllimisht sulmet e synuara ndaj infrastrukturës civile, me një qëllim shumë të qartë: të pengojë aksesin e banorëve në ujë, energji elektrike dhe ngrohje me afrimin e dimrit,” tha von der Leyen.
“Këto janë akte terrori. Rusia po përpiqet të paralizojë Ukrainën, por ne nuk do ta lejojmë këtë të ndodhë”, shtoi ajo.
Von der Leyen tha se Ukrainës i nevojiteshin 3 deri në 5 miliardë euro në muaj vetëm për të mbuluar kostot e vazhdueshme, të tilla si pagat e forcave të saj të armatosura, mësuesve dhe mjekëve.