Është mbyllur pjesa e parë e ndeshjes miqësore mes Arabisë Saudite dhe Shqipërisë, e cila po luhet në “Al Nahyan Stadium” të Abu Dabit. Një 45 minutësh i parë i barabartë, por që fati u ka buzëqeshur vendasve të cilët kanë arritur të kalojnë në avantazh me anë të Saleh Alshehri, i cili ka ekzekutuar saktësisht një 11-metërsh në minutën e 42-të.
Kuqezinjtë kishin që në fillim mundësi për të shënuar, ndërsa Bitri me kokë nuk arriti të godasë saktësisht pas ekzekutimit të një goditje këndi. Mundësi e artë për Xhixhën në minutën e 39-të, i cili pasi kaloi dhe portierin e përfaqësueses arabe, nuk arriti të dërgojë topin në rrjetë me portën e boshatisur.
Për Arabinë Saudite, në asnjë moment konkrete, i buzëqesh fati në minutën e 42-të. Bitri shkakton një 11-metërsh për prekje të topit me dorë. Saleh Alshehri është treguar i saktë nga pika e bardhë, 1-0.
Pjesa e dytë ka nisur me disa ndryshime në formacionin kuqezi: në fushë Balaj, Roshi, Rrapaj, Mitaj, Kallaku dhe Skuka. Janë larguar Hadroi, Mala Muçolli, Cikalleshi, Xhixha dhe Marku.
Nuk ka vonuar të vijë dhe goli kuqezi që ka vendosur barazpeshën. Një kombinim Rrapaj-Roshi-Balaj, me sulmuesin shkodran që e ka dërguar topin në rrjetë, 1-1.