Një 45-vjeçar është arrestuar nga Policia e Beratit, pasi qëlloi me armë drejt një automjeti ku po udhëtonin tre persona. Bëhet fjalë për shtetasin Bledar Qolja, 45 vjeç.
Fatmirësisht nga të shtënat me armë nuk ka patur persona të lënduar. Policia ka sekuestruar armën e gjahut, dy gëzhoja, një shirit me fishek dhe një thikë.
“Specialistët e Seksionit për Hetimin e Krimeve të Komisariatit të Policisë Berat arrestuan shtetasin B. Q., 45 vjeç, banues në Berat, pasi dyshohet se gjatë natës, teksa drejtonte automjetin e tij, në lagjen “Ish Kombinati”, ka qëlluar me armë gjahu (çifte), si pasojë e një konflikti për motive të dobëta, në drejtim të automjetit me të cilin lëviznin shtetasit E. T., 29 vjeç, E. D., 25 vjeç dhe G. L., 25 vjeç.
Nga e shtëna nuk ka persona të lënduar. Në vijim të veprimeve janë sekuestruar në cilësinë e provës materiale, arma e gjahut (çifte), dy gëzhoja, një shirit me fishek dhe një thikë”, njofton policia.
