Babai dhe motra e Gjergj Laçit, i cili akuzohet se mbante prej 6 vitesh të ngujuar në shtëpi gruan dhe dy djemtë e tij të mitur, kanë një version ndryshe të historisë. Për ta 52-vjeçari nuk ka ushtruar dhunë ndaj gruas dhe fëmijëve, por se ai vuan prej vitesh nga sëmundje të shëndetit mendor.
”Djali i sëmurë, nuk e dhunonte gruan. Me ushqime dhe veshmbathje i mbaja unë, ata jetonin si ne kohën e komunizmit nuk punonin. Djali vuan nga probleme mendore, nuk kishte thënë se kishte konflikte. Gruan nuk e linte të punonte, kohët e fundit nuk e linte as të dilnin nga shtëpia. I bëj apel drejtësisë ta lirojë nga burgu se është i sëmurë, bën insulina për diabet”,–tha babai i Gjergjit.
Vetë Laçi deklaroi në Polici se nuk i linte fëmijët të dilnin nga banesa për të mos u infektuar. “Kam ndjekur parimet e mia fetare. Fëmijët dhe bashkëshorten nuk i kam lënë të dalin për t’i ruajtur nga e keqja. Nuk doja që ata të nisnin drogën apo të infektoheshin”, ka pohuar Laçi.