Diskutimet në Kuvend janë të forta. Kreu i PD-së, Sali Berisha në fjalën e shkurtër në seancën plenare, tha se Porti i Durrësit është një mega aferë korruptive në shërbim të interesave strategjike të Serbisë. Nëse Rama tha se deputetët e PD-së janë pa atdhe, Berisha tha se atdheu i Ramës është Serbia.
“Zonja përmendi këtu 2013, ajo që mund tu them shqiptarëve është se pasi kanë marrë 9 vite me radhë mbi 500 mld lekë çdo vit borxh dhe kanë rritur borxhin nga 62.4* në 107*, këta vjedhës nuk janë në gjendje tu nxjerrin asgjë substanciale në 9 vite përveç pasurimit të tyre. Dua të qartësoj shqiptarët se ka ikur njeriu që ka për flamur, flamurin e Vuçiçit, që ka për atdheu, atdheun e Vuçiçit. Afera e Durrësit është aferë Rama-Vuçiç. Pas aferës qëndrojnë vëllezërit Kariç, të sanksionuar nga SHBA, BE dhe Britania, dhe tani bëjnë biznes me Edi Ramën. Dubai i Edi Ramës në Durrës është mega-afera më e madhe sot në Europë. I një njeriu që për të mbushur xhepat dhe për interesat strategjike të Vuçiç, i shkatërron vendit, portin mijëravjeçar. Flamuri i tij është flamuri i Serbisë. Flamuri i vjedhjes. Atdheu i tij është Beogradi“,-tha në Kuvend.
Ndërsa për gazetarët jashtë sallës plenare, Berisha theksoi edhe se mega afera në Durrës është ajo që bashkon Ramën, Vuçiç dhe Lukashenkon. “Epiqendra janë vëllezërit Kariç që njihen si portofoli i Lukashenkos, kompanitë e Dragomirit e të gjithë familjes Kariç kanë qenë kompani mbizotëruese në këtë vite në Bjellorusi dhe në Beograd. Këto kompani janë sanksionuar ashpër nga e gjithë bota e lirë. Transaksioni ishte vetëm formal dhe paratë i mari Emaar-i i Ramës. Kështu që ndërtuesit e vërtetë janë vëlllezërit Kariç”.