Pedagogu Fabian Topollaj në “Provokacija”, është shprehur se opozita është e dobët dhe e pafuqishme ndaj ka ndërmarrë edhe aktin e djegies së mandateve.
“Unë mendoj se kriza ka arritur në atë pikë që ne të mendojmë pak më gjatë dhe jo vetëm për atë sherrnajën e ditës. Unë mendoj se kemi nevojë për një zgjidhje që të mos na përsëritet më ky sistem dhe këto kriza.
Ndërsa ndryshimet duhen në kodin elektoral ku kam një propozim të përbërë nga tre elementë kryesorë, por jo vetëm kodi ndoshta kodi është elementi kyç.
Por kam para sysh se Kryeministri dhe mazhoranca ka një forcë aq të madhe saqë është i pamundur ndryshimi i tij apo testimi i tij gjatë periudhën mes dy zgjedhjeve. Për 4 vite Kryeministri i vendit dhe mazhorancë kanë mundur të qeverisin lirshëm dhe kjo ka forcuar së tepërmi qeverinë dhe ka polarizuar atë shkëputjen midis zgjedhësve dhe të zgjedhurve. Kjo është edhe arsyeja pse ka ardhur kriza aktuale dhe opozita ndihet e pafuqishme dhe shumë e dobët. Kjo bëri që opozita të bëjë akte të paprecedenta që nuk duhet të ndodhin në një sistem demokratik”./abcnews.al