Përfaqësuesi i lartë i BE-së për politikë të jashtme dhe siguri, Josep Borrell theksoi në një konferencë për media se 21 nëntori nuk duhet t’i gjejë Kosovën dhe Serbinë pa një marrëveshje për targat, ose në të kundërt “do të ndeshemi me një situatë të rrezikshme”.
“Mund të them që jemi duke u përballur me krizën më serioze në dhjetë vjetët e fundit dhe të dyja palët duhet që urgjentisht të tregojnë gatishmëri për uljen e tensioneve”, u shpreh Borrell.
Më herët, gjatë ditës, ai i ka dorëzuar Kosovës dhe Serbisë një propozim për zgjidhjen e krizës aktuale.
“Duhet të gjejmë një rrugëdalje nga kjo krizë. Kemi paraqitur një propozim për dalje nga kriza, [të cilin] duhet ta shqyrtojnë [palët]”, tha Borrell para një takimi të ministrave të Jashtëm të BE-së, që u mbajt në Bruksel.
Tensionet midis Kosovës dhe Serbisë aktualisht janë të larta, për shkak të vendimit të qeverisë së Kosovës për të nisur procesin e riregjistrimit të makinave me targa të paligjshme serbe.