Presidenti i Polonisë, Andrzej Duda ra pre e një telefonate të rreme natën që një raketë goditi një fshat afër kufirit ukrainas.
Personi që e telefonoi pretendonte se ishte presidenti francez, Emmanuel Macron.
Në një regjistrim 7 minutësh të thirrjes së postuar në internet nga komedianet rusë Vovan dhe Lexus, presidenti polak Andrzej Duda dëgjohet teksa komunikon në anglisht me telefonuesin.
“Emmanuel, më beso, jam tepër i kujdesshëm. Nuk dua të kem luftë me Rusinë dhe më besoni, jam tepër i kujdesshëm, tepër i kujdesshëm”, i thotë Duda telefonuesit.
“Pas shpërthimit të raketës në Przewodow, gjatë telefonatave të vazhdueshme me krerët e shteteve dhe qeverive, u lidh një person që pretendonte se ishte presidenti francez Emmanuel Macron. Gjatë telefonatës, presidenti Andrzej Duda kuptoi nga mënyra e pazakontë që bashkëbiseduesi e zhvilloi bisedën se mund të kishte pasur një tentativë mashtrimi dhe i dha fund bisedës”, njoftoi zyra e Dudës.