Të paktën 13 persona kanë humbur jetën dhe 10 të tjerë janë plagosur pas një sulmi me dron rus në stacionin hekurudhor të qytetit të Dnipros, në Ukrainë, sipas autoriteteve ukrainase.
Presidenti ukrainas, Volodymyr Zelensky, bëri të ditur se sulmi goditi një platformë ku ndodheshin një tren periferik dhe një tren i rregullt pasagjerësh.
“Fatkeqësisht, deri më tani janë konfirmuar 13 vdekje”, shkroi Zelensky në një reagim në rrjetin social X, duke shprehur ngushëllimet për familjet e viktimave.
Sipas presidentit ukrainas, shërbimet e emergjencës ndodhen në vendngjarje dhe po vijojnë operacionet e nevojshme pas sulmit.
Zelensky kërkoi gjithashtu masa të reja dhe më të ashpra kundër Moskës, duke u bërë thirrje Shteteve të Bashkuara, Bashkimit Evropian dhe vendeve të G7-s që të forcojnë sanksionet ndaj Rusisë.
Ai argumentoi se presioni ekonomik ndaj Moskës nuk duhet të lehtësohet për sa kohë që lufta kundër Ukrainës vazhdon.
Sulmi në Dnipro vjen në një kohë kur Ukraina vijon të përballet me sulme ruse ndaj infrastrukturës dhe objektivave në territorin e saj.