Ukrainasit mund të përballen me ndërprerje të vazhdueshme të energjisë elektrike nga tani deri në mars, në mot të ftohtë dhe me borë, sepse sulmet ajrore ruse kanë shkaktuar dëme “kolosale” në rrjetin elektrik. Për të përballuar situatën, autoritetet po u bëjnë thirrje njerëzve që të grumbullojnë furnizime dhe të largohen nga zonat e goditura rëndë.
Sergey Kovalenko, drejtor ekzekutiv i ofruesit privat të energjisë DTEK Yasno, tha se kompania është nën udhëzimet nga operatori shtetëror i rrjetit të Ukrainës për të rifilluar ndërprerjet emergjente në zonat që mbulon, duke përfshirë kryeqytetin, Kievin dhe rajonin lindor të Dnipropetrovsk.
“Ne duhet të jemi të përgatitur për opsione të ndryshme, madje edhe ato më të vështira. Mblidhni rroba të ngrohta dhe batanije”, u tha ai banorëve ukrainas.
Temperaturat zakonisht qëndrojnë nën zero në Ukrainë në dimër, dhe bora tashmë ka rënë në shumë zona, përfshirë Kievin. Autoritetet ukrainase po evakuojnë civilët nga zonat e çliruara së fundmi të rajoneve jugore Kherson dhe Mykolaiv nga frika se dimri do të jetë shumë i vështirë për të mbijetuar.