Autori i ngjarjes së rëndë ditën e djeshme në Ballsh ku vrau me thikën gruan dhe kunatën vetëm 18 vjeçe ka rrëfyer në polici arsyet e ngjarjes. Gazment Musta, 34 vjeç tha para grupit hetimor se ai nuk u nxit nga xhelozia, por nga kërkesa e gruas së tij për të shkuar tek prindërit.
Ai refuzoi ta linte gruan që të shkonte te prindërit për Vitin e Ri, pasi vetë nuk kishte marrëdhënie të mirë me ta.
“Ajo më kërkoi që të shkonte te prindërit, por nuk e lejova, pasi nuk shkoja mirë me ata. Aty linti debate dhe rrodhën ngjarjet” tha autori në polici.
Ai krimin e kreu në prani të dy fëmijëve 3 dhe 7 vjeç dhe ishte në gjendje të dehur.
Musta kishte qenë te prindërit e tij në fshatin Drenovë për festat dhe kur u kthye gjeti në banesë gruan dhe kunatën, e cila kishte ardhur që të merrte motrën për të shkuar te prindërit. Kërkesa e bashkëshortes u refuzua nga 34-vjeçari, që kishte vetëm dy ditë që kishte ardhur nga Greqia.