Refuzonte ti lante këmbët dhe nuk ishte e zonja të bënte ëmbëlsira, e kështu i shoqi e rrahu. Kështu e nis shkrimin Il Gazzettino, duke folur për dramën e dhunës familjare në një familje shqiptare në Rovigo të Italisë.
Një 33-vjeçar shqiptar, shkruan media italiane, ka shpërthyer inatin ndaj gruas duke e rrahur keqas, një dhunë që kishte nisur që kur e shoqja ishte shtazënë. Për shkak të xhelozisë së burrit, vitet e fundit, viktima e dhunës kishte humbur kontaktet me miqtë e familjarët, duke qenë e detyruar të rrijë brenda katër mureve të shtëpisë që ishte vendi i abuzimeve për të. Një ëmbëlsirë që nuk ishte bërë e mirë, refuzimi për ti larë burrit këmbës, përdorimi i celularit, një pasqyrë e thyer nga djali i vogël, ishin disa nga shkaqet që zemëronin 33-vjeçarin, që sipas deklaratave të gruas shqiptare, kësaj dhune i shtohej dhe dhuna seksuale.
Gjithçka kishte nisur me skena xhelozie nga i shoqi, por që ishin nënvlerësuar fillimisht nga gruaja. Shumë shpejt nisi dhe dhuna, grushta, shqelma, madje dhe abuzim seksual. Mediat italiane habiten nga dhuna e rëndë ndaj gruas shqiptare, të cilat i quajnë të tmerrshme.
Gruaja ishte rrahur edhe me majat e takave, apo në një rast tjetër ishte lidhur në divan, pse kishte bërë një selfie pa miratimin e të shoqit.
Tashmë gjykatësi italian duhet të vendosë nëse 33-vjeçari do të gjykoihet për keqtrajtim ndaj familjarëve në rrethana rënduese të një krimi të vazhduar, e që ndodhte dhe në praninë e fëmijës së mitur.