Situata e një dite më parë në Bregun e Lumit është përsëritur edhe mëngjesin e sotëm, ku banorët sërish kanë sulmuar me gurë policinë, e këta të fundit janë përgjigjur me sprajt lotsjellës.
Në orët e para të mëngjesit, policia ka shkuar për të mbajtur situatën në kontroll, teksa do të prishen banesat për projektin e zgjatimit të Bulevardit të Ri.
Banorët kanë vijuar të qëllojnë me gurë e sende të forta ndaj policëve, dhe në përplasjen e sotme raportohen të dëmtuar dhe nga efektivët dhe nga banorët.
Në pamje duket një i moshuar i gjakosur, por që për shkak të situatës nuk kuptohet se me çfarë është goditur. 77-vjeçari është dërguar në spital. Po kështu edhe një banore tjetër 45-vjeçare të cilët janë lënduar gjatë protestës.
Nuk mungojnë dëmtimet dhe nga radhët e policisë, ku një punonjës është dëmtuar me gur në kokë gjatë situatës. Ai është dërguar në spitalin e Traumës dhe ndodhet jashtë rrezikut për jetën.
E në këtë situatë, kanë shkuar sërish pranë vendngjarjes deputetë të opozitës, të cilët thonë se policia nuk i ka lejuar të afrohen. Deputeti Klevis Balliu në një status në Facebook shkruan se po bëhen akte barbare ndaj banorëve.