Kreu i Prokurorisë së Sarandës Edison Ademi është shkarkuar nga KPK, për shkak të problemeve të tij me pasurinë dhe figurën. Por duket se vendimi atij i është dukur i padrejtë teksa ka replikuar në seancën që u dha vendimi me trupën gjykuese.
“Do të përballeni me mua!”, mësohet të ketë thënë kryeprokurori i Sarandës. Trupa gjykuese përbëhej nga Firdes Shuli, Lulzim Hamitaj, Genta Tafa (Bungo).
Edhe seanca dëgjimore ndaj tij u shoqërua me debate disa ditë më parë. Komisioni i Vettingut gjen me shkelje kreun e Prokurorisë së Sarandës. Edison Ademi është shoqëruar me persona që i ka pasur nën hetim për drogë e armë e ndërsa i janë gjetur shkelje edhe në deklarimin e pasurisë.
Vetë Ademi ishte i ashpër në përgjigjet e tij duke akuzuar ILDKPI se kishte shkelur ligjin dhe kishte cënuar sigurinë e tij duke publikuar deklaratat e tij në media.
Gjatë seancës dëgjimore pati debate edhe për pasurinë e prokurorit Ademi, ku ai kishte deklaruar saktë një apartament në qytetin e Vlorës por sipas KPK-s kishte shkelur ligjin e konfliktit të interesit, kur kishte marrë me qira në përdorim një sipërfaqe toke në Vlorë për 99 vite nga shteti.Edison Ademi kërkoi rihetim nga KPK por kjo kërkesë u refuzua, dhe këtë të martë u dha vendimi për shkarkimin e tij.
Këtë mëngjes KPK shkarkoi gjithashtu edhe kreun e Gjykatës së Apelit të Krimeve të Rënda, Fehmi Petkun për fshehje të pasurisë dhe kontakte të papërshtatshme.