Pas firmosjes historike ditën e mërkurë (14 dhjetor 2022), të aplikimit të Kosovës për anëtarësimin në BE, sot kryeministri Albin Kurti do të udhëtojë për në Pragë. Kurti do t’i dorëzojë zyrtarëisht aplikimin e Kosovës për BE, Presidencës Çeke.
Sipas axhendës, kryeministri i Republikës së Kosovës me delegacion, do të pritet në Zyrën e Qeverisë së Republikës Çeke, nga ministri për Çështjet Evropiane, ndërsa pas takimeve do të ketë konferencë e përbashkët për media.
Krerët e shtetit, presidentja Vjosa Osmani, kryetari i Kuvendit, Glauk Konjufca dhe kryeministri Albin Kurti e kanë nënshkruar aplikimin e Kosovës për anëtarësim në Bashkimin Evropian. Krerët e shtetit e kanë vlerësuar këtë si ditë historike dhe si një lëvizje drejt jetësimit të ëndrrës së kamotshme të popullit të Kosovës.