Dy persona janë arrestuar nga policia gjatë një aksioni për goditjen e “Call Center-ave” në Tiranë. Në pranga janë vendosur shtetasit J.M. dhe M.D. të dy banues në kryeqytet.
Ata, në bashkëpunim me persona të tjerë ushtronin veprimtarinë e “Call-center-ave” në Shqipëri dhe Itali, përmes së cilave mashtronin qytetarë të ndryshëm dhe u merrnin paratë.
Sipas policisë, ata kanë mashtruar qindra qytetarë të vendeve të BE-së për të investuar në kriptovaluta, dhe kanë përvetësuar deri në 15 milionë euro.
Viktimat e këtyre mashtrimeve janë bindur të investojnë në kriptovaluta dhe në fund iu kanë përvetësuar shumat e marra dhe më pas janë bërë të paarritshëm për t’u kontaktuar.
Analizat financiare, të realizuara nga hetuesit nëpërmjet verifikimeve të ndryshme, kanë nxjerrë në dritë faktin se paratë e viktimave në pjesën më të madhe të rasteve, shndërroheshin në kriptovaluta të lidhura me llogari rrjedhëse jashtë shtetit, në mënyrë që të bëheshin të pagjurmueshme.