Dreka e djeshme ishte një gjetje për të shfrytëzuar festat si një mënyrë për ta çuar grupin e PD drejt bashkimit.
Të pranishëm në këtë drekë nuk ishin ish-kryedemokrati Lulzim Basha dhe kreu i Grupit Parlamentar Enkelejd Alibeaj, dhe sipas Xhelal Mziut i cili edhe mblodhi kolegët, arsyet e mungesës së tyre ishin objektive.
Sipas tij Basha ndodhej jashtë shtetit kurse Alibeaj kishte pasur agjendë të caktuar paraprakisht.
“Ka pasur tentativa të shumta, por vazhdimisht kanë përfunduar në dy grupime. Ishte një gjetje për të shfrytëzuar një festë për mbylljen e vitit por edhe një hap drejt bashkimit. Parimisht mendoj që është arritur një gjë jo e vogël. Për të parën herë bashkohen të dyja grupimet. Ky është fillimi i një rrugëtimi të shpejtë për të bashkuar PD-në apo për të unifikuar kandidatin më 14 maj. Vetëm 3-4 deputetë nuk u përgjigjën. Ishin 35 veta pjesëmarrës. Ata që nuk erdhën ose ishin jashtë shtetit ose kishin agjendë të përgatitur më parë”.