Në Shkodër, Policia ka çmontuar të shtunën 21 kamera të vendosura në shtyllat elektrike, në rrugë, për të mbledhur informacion, për qëllime kriminale.
Zëdhënësi i Policisë së Shtetit, Gentian Mullaj deklaroi se pas Shkodrës, do të verifikohen kamerat e instaluara në çdo qytet në vend. Sipas tij, kjo është një strategji për t’u prerë rrugën krimnelëve, në mënyrë që të mos ketë deskonspirime në operacionet e policisë.
“Drejtori i Përgjithshëm i Policisë së Shtetit u ka kërkuar të gjithë drejtorëve në qarqe, që të evidentojnë në të gjitha qarqet, kamerat që janë pa zot. Tani është parë e arsyeshme. Është një strategji, e para për t’u prerë rrugët personave kriminalë, që të mos marrin informacion për lëvizjet e policisë. Nuk dihet ende numri i kamerave, jemi kryer veprime hetimore nën drejtimin e Prokurorisë së Shkodrës, veprime të kësaj natyre do të kryhen në të gjithë republikën. Kanë nisur verifikimet”, theksoi ai.
Edhe Sali Berisha ka mbajtur një qëndrim, ku thotë se vendosja e kamerave është dëshmi se qyteti vijon që të jetë nën sundimin e mafies. Sipas Berishës, një sistem kamerash të specializuara nga organizatat kriminale, ka edhe në Vlorë, Elbasan e në Korçë, kudo jeni të filmuar.