Ish-presidenti i SHBA-së, Donald Trump, po përpiqet të rikthehet në mediat sociale vetëm 10 ditë përpara ngjarjes së parë zyrtare të fushatës së tij presidenciale 2024.
Trump i cili dikur posedonte llogaritë e mediave sociale që ishin ndër më të ndjekurat në Facebook dhe Twitter, u hoq nga të dyja platformat për veprimet e tij në lidhje me sulmin e 6 janarit 2021 në Kapitolin e SHBA. Ai u rikthye në Twitter falë rezultateve të një sondazhi të përdoruesve publik të kryer nga pronari i ri, Elon Musk.
Të martën, zyra e Trump i dërgoi një letër kompanisë mëmë të Facebook, Meta, duke kërkuar një seancë për të diskutuar rikthimin e ish-presidentit në internet për hir të fjalës së lirë, sipas NBC News .
“Ne besojmë se ndalimi i llogarisë së Presidentit Trump në Facebook ka shtrembëruar dhe penguar në mënyrë dramatike diskursin publik”, thuhet në shkresën e dërguar.
Kompania Meta mësohet se i ka thënë NBC se ‘do të japë një vendim në javët në vijim, në përputhje me procesin që ka parashtruar.’