Askujt nuk i ka shkuar në mendje se mund të gjendej në të njëjtën kohë në 2 shtete të ndryshme. Por kjo nuk është e pamundur. Në kufirin Zvicër-Francë ndodhet një hotel, ku gjysmat e dhomave i përkasin territorit francez, e gjysmat atij zviceran.
E keni provuar ndjesinë e të fjeturit në dy shtete të ndryshme njëkohësisht? Pra të shtrihesh në një krevat ku kokën ta kesh në Zvicër dhe këmbët në Francë.
Në majë të maleve me pyje të dendur, që ndajnë pikërisht këto dy shtete, ndodhet një fshat i vogël, La Cure.
E në zemër të tij është i vendosur një hotel familjar, i cili pret vizitorë anë e mbanë botës. Hoteli Arbez shtrihet gjysma në territorin francez, e gjysma tjetër në atë zviceran.
I ndërtuar modestisht në vitin 1921 ai është tashmë i përhapur nëpër europë për pozicionin unik që ka.
“Unë gjithmonë i mirëpres turistët duke iu thënë mirë se vini në hotelin tonë, iu ofrojmë një dhomë dykombëshe. Habia dhe gëzimi në të njëjtën kohë vërehet në sytë e tyre, duke mos e ditur nëse do të flenë në Zvicër apo në Francë”- u shpreh menaxheri i hotelit.
Ekzistenca e këtij hoteli të vecantë vjen si pasojë e Traktatit të Dappes në vitin 1862, ku Franca dhe Zvicra ranë dakord të bënin një shkëmbim të vogël territorial, në mënyrë që të lejonin kontrollin e plotë francez në një rrugë strategjike aty pranë.