Presidenti Ilir Meta ka folur për domosdoshmërinë e një klime të re të dëgjimit të njëri-tjetrit, në mjediset universitare, shoqërore dhe politike.
“Gjithnjë të hapur ndaj mendimit kritik dhe përmirësues në mënyrë që shoqëria jonë të reflektojë dhe të reformohet vazhdimisht”, ka thënë kreu i shtetit.
Ai është ndalur në situatën në arsim ku tha se protesta e drejtë e studentëve gjatë dhjetorit të kaluar treguan se zbatimi i ligjit të arsimit të lartë ka probleme.
“Zbatimi i Ligjit të Arsimit të Lartë, vështirësi për të siguruar autonominë dhe pavarësinë financiare të universiteteve publike. Reforma në Arsimin e Lartë dhe kërkimi shkencor duhet të ketë një frymë më gjithëpërfshirëse. Reforma në Arsimin e Lartë duhet të synojë krijimin e kushteve të duhura për të përmirësuar cilësinë e mësimdhënies, të synojë që universitetet të jenë të pavarur dhe të pakushtëzuar nga politika”, vijoi Meta.
Ai e quan të pajustifikuar vonesën e pajisjes së studentëve me “Kartën e Studentit”, duke e konsideruar një detyrim imediat për t’u garantuar studentëve të drejtat që burojnë prej saj, si të studentëve të tjerë në vendet e rajonit dhe të Europës.