Për aksionin e Policisë së Shtetit me çmontimin e kamerave të sigurisë që janë në dorën e bandave kriminale, sot ka reaguar edhe Ministri i Brendshëm, Bledi Çuçi. Ai tha se është një nga lëvizjet më të mira të policisë dhe fillim i mbarë i vitit.
“Lajmi këtu është që po ndërhyjmë dhe kjo është pozitive për luftën kundër krimit të organizuar. Sa i takon bizneseve, është detyrim ligjor që të mbajnë kamera, por besoj se duhet t’ia lëmë këtë gjë të shkuarës dhe të përqendrohemi te puna e policisë për të dhënë një mesazh të qartë për krimin, që nuk ka më hapësira për të krijuar një mjedis ku të veprojnë të lirë”, tha ministri.