Policia e Korçës ka parandaluar një vrasje, dhe ka vënë në pranga një 49-vjeçar. Ai ka kërcënuar me armë një tjetër shtetas, pas një zënke për motive të dobëta mes tyre. Sipas Policisë, sherri mes dy personave ndodhi në një lokal të lagjes nr. 15 të qytetit të Korçës, ku i arrestuarit ka kërcënuar me armë pronarin e këtij lokali, gjatë një konflikti mes tyre. Menjëherë pas marrjes së informacionit, u bë e mundur arrestimi i autorit të kësaj ngjarjeje, të cilit iu sekuestrua edhe arma e zjarrit që e mbante me vete në makinë.
Njoftimi i Policisë
“Kanosi me armë zjarri, një shtetas, gjatë një konflikti për motive të dobëta, vihet në pranga 49-vjeçari me precedent të mëparshëm penal. Sekuestrohet arma e zjarrit tip pistoletë. Shërbimet e Komisariatit të Policisë Korçë, pas marrjes së njoftimit se në lagjen nr. 15, Korçë, në një lokal, një shtetas kishte kanosur me armë zjarri pronarin e lokalit, gjatë një konflikti midis tyre, kanë organizuar punën me qëllim kapjen e autorit të dyshuar.
Si rezultat i veprimeve të mirë koordinuara u bë arrestimi në flagrancë i shtetasit: J. P., 49 vjeç, banues në Korçë, i dënuar më parë për veprat penale “Kanosja për shkak të detyrës” dhe “Drejtimi i automjeteve në mënyrë të parregullt”.
Ky shtetas dyshohet se gjatë një konflikti për motive të dobëta, ka kanosur me armë zjarri një 50-vjeçar, në lokalin e këtij të fundit. Në vijim të veprimeve për këtë rast, gjatë kontrollit të ushtruar nga shërbimet e Policisë, në banesën e 49-vjeçarit J. P., u gjetën një armë zjarri pistoletë dhe një sasi municioni luftarak, të cilat u sekuestruan në cilësinë e provës materiale.
Materialet i kaluan Prokurorisë pranë Gjykatës së Rrethit Gjyqësor Korçë, për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”.”