Një nga figurat e njohura të Partisë Demokratike, Lajla Përnaska, e cila ka shpallur kandidaturën e saj për kryetare te Bashkisë së Tiranës, komentoi në Neës 24 emërimin që Sali Berisha i ka bërë Belind Këlliçit si kandidat për Tiranën. Përnaska e cilësoi Këlliçin një kandidaturë të imponuar, duke e krahasuar me Lulzim Bashën.
“Ne hyjmë në një proces zgjedhor dhe flasim për zgjedhjet. Duket në normalitet çdo gjë. Unë si votuese respektoj zgjedhjet, por nuk kam përzgjedhje. Sepse ne kemi pranuar të gjithë të mbështesim kandidaturat që na ka dhënë kryetari i partisë. Kryetarokracia ka prodhuar gjithmonë kandidatura të imponuara. Historia na vë përpara disa fakteve që duhet të dimë t’i lexojmë. Kam më të freskët kandidimin e Lulzim Bashës. Mënyra e qeverisjes nga Basha ishte zhgënjyese sepse premtimet nuk i mbajtëm”, tha ajo.
Përnaska e quan të mbyllur misionin për të mbështetur PD-në. “Unë jam e gatshme të marr përsipër sfidën e garës si kandidate për Bashkinë e Tiranës. Kjo është mundësia e vetme që të ofron sistemi sot, për t’u bërë direkt pjesë e garës. Unë misionin për të mbështetur PD e quaj të mbyllur sepse është investim deri në sakrificë dhe rezultatet kanë qenë të trishta. Të mbështesim një kandidate femër. I ka ardhur koha Tiranës për të mbështetur një kandidate femër”, nënvizoi kandidatja e djathtë për Tiranën, Lajla Përnaska.