Ekipi shqiptar i kërkim-shpëtimit që ndihmoi në gjetjen e të mbijetuarve nga tërmeti shkatërrues i rënë në rajonin e Gaziantep-it mëngjesin e 6 shkurtit, është kthyer në Shqipëri pas përfundimit të misionit.
Ministri i Mbrojtjes, Niko Peleshi, ka publikuar dhe videon e kthimit të ekipeve të djemve dhe vajzave nga Forcat e Armatosura, Emergjencat Civile dhe ekipet shëndetësore që kontribuuan përgjatë 11 ditëve në operacionet e kërkim-shpëtimit.
“Krenari dhe mirënjohje pafund për 3 ekipet e vajzave dhe djemve nga Forcat e Armatosura, Emergjencat Civile dhe ekipet shëndetësore që kontribuuan përgjatë 11 ditëve në operacionet e kërkim-shpëtimit në zonat e shkatërruara nga dy tërmetet e fuqishme në Turqi.Ata u nisën për t’u kthyer në Atdhe, duke marrë me vete edhe respektin e popullit turk, që njëherësh është vlerësim për Shqipërinë tonë. Të gatshëm dhe solidarë sa herë të jetë nevoja për kontributin tonë”, shkruan Peleshi.
Edhe kryeministri Edi Rama vlerësoi misionin e 3 skuadrave shqiptare, për të cilët tha se janë kthyer në atdhe duke marrë me vete mirënjohjen e popullit turk për ndihmën e dhuruar.
“Krenari dhe respekt për 3 skuadrat e vajzave e djemve nga Forcat e Armatosura, Emergjencat Civile dhe Shërbimi Shëndetësor, të cilët përgjatë 11 ditëve e netëve u angazhuan në operacionet e kërkim-shpëtimit në zonat e shkatërruara nga tërmeti katastrofik në Turqi. Ata kthehen në atdhe, duke marrë me vete respektin e mirënjohjen e popullit turk, të mediave e të autoriteteve turke, që njëzëri e kanë vlerësuar Shqipërinë si vendi i vogël me zemër të madhe”- shkruan Rama.