Nënkryetarja e Partisë Demokratike të Kosovës, Vlora Çitaku thotë se në takimin e së hënës që do të mbahet në Bruksel mes presidentit Aleksandër Vuçiç dhe kryeministrit Albin Kurti, ky i fundit do të nënshkruajë marrëveshjen sipas planit franko-gjerman, ku parashihet formimi i Asociacionit të komunave me shumicë serbe. Çitaku përmes një postimi në Facebook, shkruan se plani franko–gjerman nuk erdhi nga asgjëja, por ai është produkt i negocimit të kryeministrit prej dy vitesh.
Postimi i plotë
Plani franko-gjerman nuk ka pikur nga qielli. Ai është produkt i negocimit të Kryeministrit tash e dy vite. Kryeministri Kurti ka arritur suksesshëm që dialogun Kosovë-Serbi nga marrëveshja politike ta kthejë në problem të sigurisë.
Të hënën Kryeministri Kurti do të nënshkruaj marrëveshjen për armëpushim, jo marrëveshjen finale, me njohjen reciproke në qendër. Të hënën Kryeministri Kurti do të nënshkruajë zotimin e tij për të vazhduar dialogun edhe për një dekadë.
Të hënën Kryeministrk Kurti do të nënshkruajë asociacionin, apo Zajednicën siç e quante dikur.
Të hënën Kryeministri Kurti do të nënshkruajë zotimin për t’i dhënë Kishës Ortodokse Serbe status politik. Kaq për gjenialitetin e Kryenegociatorit Kurti.