Dan Hutra, autori i vrasjes së tre grave dhe plagosjes së tre të tjerave u arrestua rreth orës 18:45 të së mërkurës.
Sipas Policisë së Shtetit, plagosja e Marjana Gurakuqit në Astir, vrasja e dyfishtë në Bathore dhe vrasja e Etleva Kurtit në Kodër Kamëz, janë kryer në një hark kohor prej 33 minutash.
Skeda e pasur kriminale e 40-vjeçarit Hutra daton në vitin 2003. Së fundmi Dan Hutra u lirua nga Gjykata e Tiranës më 16 shkurt, dy ditë pasi Apeli kishte refuzuar lirimin e tij nga qelia.
Sakaq, në rrjete sociale po bëhet thirrje për një protestë sot në Tiranë para Ministrisë së Drejtësisë. “12 gra të vrara që nga 1 janari i vitit të kaluar janë një klithmë alarmi, dëshpërimi dhe zemërate. Pas dorës së vrasësit qëndron një kulturë e normalizuar dhune, institucione që nuk funksionojnë dhe dështim i të gjithë normave shoqërore. Sot, ora 17:00, protestojmë te Ministria e Drejtsisë, Bulevardi Zogu I Parë ,Tiranë”,-thuhet në njoftimin e nismës rinore “Ylberofilia”.