Forcat e Armatosura kanë zvhendosur municione të rrezikshme nga ambientet e një magazine të braktisur në lagjen Dobraç të Shkodrës.
Ambienti i përkiste ish “Institutit të misrit”, por që tashmë është privatizuar. Ka qenë vetë pronari që ka dhënë alarmin, ndërsa dyshohen se municionet mund të jenë çuar aty gjatë hapjes së depove në vitin 1997.
Ministria e Mbrojtjes ben me dije se zhvendosja eshte bere sot nga struktura speciale për eleminimin e materialeve të rrezikshme EOD e batalionit të Xhenios në Komandën Mbështetëse.
Specialistët EOD pasi evidentuan prezencën e municioneve luftarake, konstatuan se bëhej fjalë për 4 predha GHLKT “Granatë Hedhës i Lehtë Kundër-Tank” si dhe 1 granatë dore mësymëse.
Për shkak të llojit të tyre, municionet e gjetura në magazinë, dyshohet të jenë marrë nga depot e Forcave të Armatosura në vitin 1997.
Ekspertët e kompanisë EOD, morën masa për sigurimin e vendit dhe nëpërmjet automjeteve speciale, bënë të mundur transportimin e predhave dhe magazinimin e tyre në depot ushtarake të batalionit të Xhenios.
