ekretarja e Brendshme e Britanisë së Madhe, Suella Braverman vazhdon të mbrojë legjislacionin e diskutueshëm të vendit për emigrantët ilegalë, duke thënë se qeveria nuk është duke “shkelur ligjin”, transmeton Anadolu.
“Ne kemi shumë besim se masat tona që kemi shpallur dje janë në përputhje me detyrimet tona të së drejtës ndërkombëtare, si për shembull, me Konventën për Refugjatët dhe Konventën Evropiane për të Drejtat e Njeriut”, tha ajo për “Sky News”.
Britania të martën prezantoi projekt-ligjin për emigracionin ilegal, i cili lejon ndalimin dhe deportimin e shpejtë të secilit që hyn ilegalisht në vend.
Pas njoftimit, Agjencia e OKB-së për Refugjatët (UNHCR) shprehu shqetësim për këtë çështje, duke thënë se “nëse miratohet legjislacioni, do të përbënte ndalim të azilit”.
Braverman tha se rreth 45 mijë persona kanë arritur ilegalisht në Britani vitin e kaluar. “Duhet të marrim masa, ‘status quo’-ja është e papranueshme”, tha ajo duke mbrojtur propozimin.
“Ardhja këtu pa baza ligjore dhe pa leje është shkelje e ligjeve tona dhe të kalosh nëpër një vend të sigurt ku ata duhet të kishin dhe mund të kishin kërkuar azil”, tha Braverman.
Plani i ri i qeverisë britanike për të ndaluar emigrantët me varka të vogla është pritur me kritika nga organizatat e të drejtave të njeriut dhe avokatët e refugjatëve, të cilët argumentojnë se kjo shkel të drejtën ndërkombëtare dhe detyrimet e Britanisë ndaj konventës për refugjatët.
Plani përfshin ndalimin e shumicës së atyre që mbërrijnë me varka të vogla për 28 ditët e para pa lirim me kusht ose rishikim gjyqësor dhe pa mundësinë që të parashtrojnë kërkesë për ndalimin e dëbimit deri pas largimit të tyre.
Sipas organizatës “Amnesty International”, të drejtat e migrantëve, refugjatëve dhe azilkërkuesve mbrohen sipas të drejtës ndërkombëtare, pavarësisht se si dhe pse mbërrijnë në një vend.