Kryeministri i Kosovës, Albin Kurti përmes një shkrimi në Twitter ka zbuluar ofertën e tij ndaj presidentit serb, Aleksandar Vuçiç. Kurti shprehet se i ka kërkuar Vuçiç të pranojë planin e tij për vetë-menaxhim të serbëve përmes një shoqate që do ta hartonte ai.
Sipas tij, ky plan bujar iu propozuar presidentit serb pas refuzimit të nënshkrimit të Marrëveshjes së 27 shkurtit në Bruksel dhe para se të refuzojë Aneksin e propozuar me 18 mars në Ohër.
“Pas refuzimit të nënshkrimit të Marrëveshjes së 27 Shkurtit dhe para se të refuzonte përsëri nënshkrimin e saj me Aneksin e 18 Marsit, Presidenti i Serbisë refuzoi ofertën time bujare të vetë-menaxhimit për serbët, në një shoqatë që unë do ta hartoja dhe propozoja. A është ai Dr Jo apo Z. Nyet? E dimë që ai nuk është mjek”, shkroi Kurti në Twitter.
Lidhur me asociacionin e komunave serbe në veri të Kosovës, Kurti ka deklaruar se në fakt nuk do të ketë një të tillë. Ai tha se palët janë dakordësuar për vetë-menaxhim dhe jo vetë-qeverisje. Nga ana tjetër, presidenti serb këmbëngul se asociacioni është kusht i panegociueshëm.