60-vjeçarja Bajame Seneja u plagos pasditen e sotme pas të shtënave me armë zjarri në fshatin Ballagat të Lushnjës.
Vëllai i saj dha një intervistë për mediat, ku deklaroi se autori që qëlloi me armë zjarri ndaj motrës së tij ishte Shaip Hasalla.
Sipas tij, shkak është bërë konflikti për tokën, për të cilën sot ishte mbajtur edhe një seancë gjyqësore.
“Na qëlluan Shaip Hasalla me djemtë. Para dy vjetëve na ka qëlluar me armë. Sot na qëlluan sërish, na plagosën motrën. Edhe sot ishim në gjyq për këtë çështje, mbaruam çështjen na zunë pritë. Unë isha në makinë së bashku me avokatin nga Tirana. Nipi mbrapa ka qenë me motrën, ndaj tyre u qëllua me armë zjarri. Na sulmuan për 2 hektarë tokë, që kam kaq vite me një stallë që e kam atje dhe sot ky zotëria do ta marrë me forcë”, u shpreh vëllai i 60-vjeçares së plagosur.