Italia është bërë vendi i parë perëndimor që bllokon chatbotin e avancuar ChatGPT. Autoriteti italian i mbrojtjes së të dhënave tha se kishte shqetësime për privatësinë në lidhje me ChatGPT, i cili u krijua nga start-up-i amerikan OpenAI dhe mbështetet nga Microsoft.
Italianët kanë akuzuar ChatGPT për dështimin për të kontrolluar moshën e përdoruesve të saj që supozohet të jenë 13 vjeç e lart. Miliona njerëz kanë përdorur ChatGPT që nga fillimi i tij në nëntor 2022. Ai mund t’u përgjigjet pyetjeve duke përdorur gjuhë natyrale, të ngjashme me njeriun dhe gjithashtu mund të imitojë stile të tjera të të shkruarit, duke përdorur internetin si bazën e të dhënave.
Mbikëqyrësi italian tha se jo vetëm që do të bllokonte chatbot-in e OpenAI-t, por do të hetonte gjithashtu nëse ai ishte në përputhje me Rregulloren e Përgjithshme të Mbrojtjes së të Dhënave.
Mbikëqyrësi tha më 20 mars se në aplikacion u regjistruan shkelje të të dhënave si bisedat e përdoruesve dhe informacioni i pagesave.
Microsoft ka shpenzuar miliarda dollarë për ChatGPT dhe ka thënë gjithashtu se do të fusë një version të teknologjisë në aplikacionet e paketës Office, duke përfshirë Word, Excel, PowerPoint dhe Outlook. Ka pasur shqetësime mbi rreziqet e mundshme të inteligjencës artificiale (AI), duke përfshirë kërcënimin e saj ndaj vendeve të punës dhe përhapjen e dezinformatave dhe paragjykimeve.
Në fillim të kësaj jave, figurat kryesore të teknologjisë, përfshirë Elon Musk, kërkuan që këto lloje të sistemeve të AI të pezulloheshin mes frikës se gara për t’i zhvilluar ato ishte jashtë kontrollit. Chatbot nuk është gjithashtu i disponueshëm në territorin e Kinës, Hong Kongut, Iranit dhe Rusisë dhe pjesë të Afrikës ku banorët nuk mund të krijojnë llogari OpenAI.