Ish-presidenti i Komitetit Olimpik Shqiptar, Viron Bezhani, duke folur për mbylljen e lojërave të fatit, u shpreh se kryeministri Edi Rama e mori këtë vendim pasi i doli nga duart kontrolli mbi to.
Gjatë një interviste për Panorama TV, ai e cilësoi drastik vendimin për mbylljen e lojërave të fatit, pasi, sipas tij, shkaktoi dëm të madh ekonomik në vendin tonë.
“Kryeministri merr një vendim të menjëhershëm, me atë fundin e marrëzisë dhe ndërpret lojërat e fatit. Kur merr një vendim duhet ta mendosh mirë një vendim. Përveç të këqijave, edhe nga ana ekonomike solli shumë dëm. Janë me miliarda që kumbisnin. Por duke parë traumën e madhe që kishte vërejtur kryeministri, kur tha që më kanë marrë edhe nga burgu dhe duhen mbyllur. Asnjëra nga këto nuk ishte arsyeja. I mbylli urgjentisht. Përveç se i mbylli, doli në Lushnjë dhe tha se 90 % e grave më kanë kërkuar t’i mbyll lojërat e fatit. Kryeministri nëse do të zbatonte ligjin… Bixhozi është një e ardhur që qëndron edhe mbi pushtetin. Unë kam punuar prej kohësh në lojërat e fatit dhe të ardhurat nga këto lojëra janë mbi drogën. Ato kontrollojnë edhe pushtetin. Arsyeja ishte se kryeministrit i doli nga dora kontrolli mbi bixhozin. Duke pasur probleme mori një vendim drastik për t’i mbyllur. Duke shkelur ligjin, duke shkelur çdo gjë, çdo aspekt që e nxit lojtarin, e nxit krimin, ai lojtar prap tek ajo marrëzi do të shkojë. Nëse ajo ishte tragjedi për familjet, atëherë ky të gjejë një mundësi”, u shpreh Bezhani.