Në Indi u inagurua tuneli i parë nënujor i metrosë, në vend. Linja më e re e metrosë së Kalkutës, e vendosur për t’u hapur për publikun në nëntor, kalon nën lumin Hooghly në verilindje të qytetit, me tunelin 32 metra nën ujë.
“Ky është një moment historik për Metro Railway,” tha në një deklaratë Kausik Mitra, shefi i marrëdhënieve me publikun për sistemin e metrosë Kolkata. “Ky është një hap revolucionar në ofrimin e një sistemi modern transporti për njerëzit e Kalkutës dhe periferive.”
Linja do të lidhë stacionin e metrosë së Howrah Maidan që do të hapet së shpejti dhe stacionin ekzistues të Esplanade në anën e kundërt të lumit, duke udhëtuar 520 metra në vetëm 45 sekonda. Sapo të hapet, Howrah Maidan do të jetë stacioni më i thellë i metrosë në Indi.
Për të bekuar tunelin dhe trenin e ri, zyrtarët kryen një puja, ose ritual fetar hindu, për të sjellë fat, pasi treni u tërhoq me sukses në stacionin në Howrah Maidan. Lulet e shafranit në ngjyrë portokalli të ndezur u spërkatën rreth ndarjes së konduktorit brenda trenit dhe një punëtor theu një kokos mes brohoritjeve dhe duartrokitjeve nga kolegët e tij.
Linja e plotë e metrosë përmes Howrah Maidan do të jetë e gjatë 4.8 km. Kalkuta ishte qyteti i parë në Indi që kishte një sistem metroje. Infrastruktura është një nismë e madhe kombëtare nën udhëheqjen e kryeministrit indian Narendra Modi.
Në fillim të këtij viti, vendi festoi hapjen e pjesës së parë të një autostrade të re ekspres me tetë korsi që lidh qytetet e Nju Delhit dhe Mumbait. Seksioni i parë i përfunduar lidh kryeqytetin me qytetin e Lalsot në shtetin veriperëndimor të Rajasthan, një destinacion popullor për turistët.