Aktivistja Rita Behadini, mendon se vajzat që martohen herët bien shpesh pre e dhunës seksuale. Ajo tregoi se ka raste kur shtatzëni të padëshiruara çojnë në martesa të parakohshme dhe rrjedhimisht ndërpritet edukimi i vajzave.
“Kjo ndikon më pas në gjithë karrierën dhe vazhdimësinë e jetës së saj. Ka disa të dhëna të cilat tregojnë se vajzat të cilat janë pre e dhunës në familje dhe dhunës seksuale, shumë shpesh janë vajza të cilat kanë lidhur martesë shumë herët, ose kanë një fat të tillë që kanë ngelur shtatzënë shumë herët dhe detyrimisht kanë ngelur me të njëjtin partner”,-tha Behadini.
Shkalla e shtatzënisë së paplanifikuar tek adoleshentët në Maqedoninë e Veriut është 11% dhe është një nga më të lartat në Evropë. Shkalla e lindjeve te të miturat është 15.7 në 1000, që është pothuajse tre herë më e lartë sesa mesatarja prej 6 në 1000 lindje për vendet e BE-së.